Уулзалтад аймгийн ЗДТГ-ын дарга Б.Сандагсүрэн, МОРА агро парк төслийн санаачлагч Ёкозүми Ёшиюки, МОРА ТББ-ын Ерөнхийлөгч Д.Нарантуяа болон бусад албаны төлөөлөл оролцлоо.
МОРА агро парк төсөл нь байгаль орчныг хамгаалах үүднээс химийн бордоо, хөрс ариутгагч бодис хэрэглэдэггүй, хүн бүрийн сэтгэл амар идэж болох эрүүл хүнс, жимс ногоог нутагшуулах технологийг нэвтрүүлэх зорилготойгоор 2017 оноос хойш манай улсад судалгаа, туршилтын ажлуудыг үе шаттайгаар хийжээ.
Харин төслийн зүгээс манай аймгийн иргэн, агрономич А.Махмедтай хамтран ажиллаж, түүний талбайд Япон улсын дээд сортын шар тарвасны 1000 ширхэг үрийг соёолуулан, тарьж туршиж үзсэн нь амжилттай болсон байна.
Цаашид үргүй тарвас, дөрвөлжин хэлбэртэй тарвас болон Японы дээд сортын жимс, жимсгэнийг нутагшуулах, байгаль цаг уурын нөхцөлд зохицсон сортыг гаргаж, ирээдүйтэй сортоор батлуулах, тариалах туршилт судалгааны ажлуудыг хийхээр төлөвлөж байгаа талаар МОРА агро парк төслийн багийн төлөөлөл дурдлаа.
ИТХ-ын дарга Г.Пүрэвганди газар тариалангийн чиглэлээр Ховд аймагт хийж хэрэгжүүлж байгаа төсөл, хөтөлбөрүүд, орон нутгийн онцлогийг танилцуулсан юм. Мөн химийн бордоо, хөрс ариутгагч бодис хэрэглэхгүйгээр тариалангийн хөрс сайжруулах, хөрсний нөхөн сэргээлт хийх зэргийн аймаг орон нутагтаа хэрэгжүүлж болох чухал технологи гэдгийг онцоллоо.
